Minahasa so perlu Bakera

Denni Pinontoan da tulis

Sore sampe malam tanggal sambilang Februari 2012, kita da sama-sama deng tamang-tamang Mawale Cultural Center di satu tampa kost, di jln. Kalutay, Kakaskasen, Tomohon. Waktu itu torang bacirita, baku tukar pikiran soal rencana Sekolah Mawale kalima yang mo beking di Sonder, pa Fredy Wowor pe rumah. Depe topic sadiki ba goda, “Ibu Pertiwi Minahasa Saki Bantahang.”

Torang mulai bacirita dari soal istilah itu. Kyapa musti pake istilah “ibu pertiwi”? Kyapa lei kata musti ada tu istilah “Saki Bantahang”? Rame depe bacirita. Tiap-tiap orang kase depe pikiran. Sadiki rame waktu bacirita istilah “ibu pertiwi.” Depe istilah itu dapa rasa nda pas lantara ada kase paar deng kata Melayu Manado “saki bantahang.” Maar Fredy Wowor bilang, biar jo kata bagitu, s’bab deng pake istilah itu dapa lia tu depe soal. “Kita lei ba pikir bagitu. Maar, pikir par pikir, ini no kote tu depe soal. Bahasa Indonesia, yang tantu katu deng cara ba pikir Indonesia kase baku mangada deng bahasa Melayu Manado, yang tantu lei torang mo kase tunjung tu cara ba pikir torang di sini,” Fredy bilang.

Deri samua pikiran yang tamang-tamang da kase, kita pe kesimpulan, ternyata kote tu “ibu pertiwi” pe maksud Tanah Minahasa yang da kase sama deng “mama” atau “inang” yang tampa lahir orang-orang Minahasa. Tu “saki bantahang” kata depe maksud mo kase gambaran tu kondisi Minahasa skarang yang kalo boleh mo kase sama deng mama-mama yang baru kase lahir ade, lantaran nda stou da urus bae-bae ato salah urus, kong sampe dapa saki bantahang. “Kalo so nae di kapala tu darah putih, cuma dua kasiang. Kalo nyanda jadi bingo-bingo, mati no,” Rikson Karundeng bicara.

Deri carita saki bantahang ini, torang abis itu bacirita panjang soal apa yang biasa orang-orang Minahasa beking pa mama-mama yang baru lahir akang anak. Torang da pa inga tu biasa ja beking di kampung, “bakera”, mandi uap yang depe aer da rubus sama-sama deng rampa-rampa. Bakera memang bukang cuma voor tanta-tanta baru melahirkan. Bakera lei boleh voor orang yang baru bae saki. Rampa-rampa ja pake bakera depe biasa: brama kusu, lemong suangi, dawong tawaang, akar sese’mbanua, karimenga, kayu lawang.

Rikson Karundeng bilang, yang kata dia pernah tau, tu tanta yang mo kera, duduk di kursi yang ada ba lobang tenga. Mungkin stou, kursi yang model bagitu musti depe laki stel sandiri. Kong kata, tu tanta nda boleh pake calana dalang. Depe badan samua tutu deng kain. Biasa yang kita tahu tu tanta tutu deng blangket. Kong tu air yang da rubus sama-sama deng rampa-rampa saleng di loyang. Kong kase di bawa kursi ba lobang tengah. Tu tanta duduk ba senga sadiki. Depe uap nae dari bawa.

“Memang katu panas no. Basuar-basuar tu tanta. Itu kata depe maksud mo kase bersih tu sisa-sisa da melahirkan,” kita ba tambah.

Depe waktu bakera dang? Biasa kata pagi-pagi sekali. Tu depe laki so bangong amper siang, kong mo masa’ aer. Maar tu rampa-rampa so sadia deri klamaring siang ato sore. Tu depe laki karu lantaran ja ma’sali ato ma’sadi, jadi musti siap trus.

Abis ba kera, yang kita pernah kita tahu, tu aer sisa yang so ba lao-lao tanta pake mandi. Abis mandi barumunduk bubur pake daong turi. Lebe mantap lei pake tolor ayam biasa. Ado, memang katu sehat butul.

Dulu kata tu ja ator depe cara deng rampa-rampa yang mo pake biang kampung yang da bantu tu tanta da melahirkan. Kalo nda depe laki, biasa biang kampung ja ator samua waktu mo bakera.

Itu kata tu depe cara supaya parampuang yang baru melahirkan nda mo dapa saki bantahang. Maar, biasanya kata, saki bantahang timbul lantaran, tu tanta pe laki atau yang ba ma’sali nda urus butul-butul waktu baru melahirkan. Ato lei kata lantaran memang da kase biar nda urus. “Biasa lei, orang tua ja bilang, kalo baru melahirkan jangan ja ba dinging, pegang aer dinging atau ba kerja berat,” Candra Rooroh, nyong-nyong fasung dari Treman, Tonsea ba tambah.

“Jadi, kalo bagitu depe maksud kwa, saki bantahang timbul lantaran tu yang ma’sali, ba stel ba urus, maar nyanda butul da urus. Kadua, kase biar, nyanda parduli. Ketiga, dapa lia tare da ba urus, maar sala urus. Kaampa, nyanda ba dengar tu orang tua pe pesan,” Matulandi Supit dari AMA Sulut angka bicara.

So bagitu stou kata tu torang pe Tanah Minahasa sekarang. Saki bantahang. Dapa lia di rupa-rupa persoalan. Antara laeng, kalakuan “so smokol ba lolo lai,” alias korupsi. Kase rusak tu tampa hidop (lingkungan hidup) cuma lantaran mo cari untung. Ba bajual paramgpuang (trafiking). Pemerentah yang cuma ba pikir diri sandiri deng partai kong nda parduli pa rakyat. Deng banyak lei masalah laeng.

Mudah-mudah jo woon itu samua masih depe gejala, blum saki bantahang. No, kalo tu darah putih so nae di kapala, apa jo tu mo jadi. Nanti Minahasa kurang mo dengar di carita. Kalo bagitu, Minahasa perlu bakera, supaya tu darah putih nda nae di kapala yang boleh jadi mo bunung tu hidop Tou Minahasa deng depe samua-samua yang ada di dalang.